தங்க இடமில்லை.. வேலையில்லை: இலங்கையில் இருந்து துபாய் வந்தவர்களுக்கு கிடைத்த உதவி!

துபாய்….

ஐக்கிய அரபு அமீரகத்தில் வேலை தேடி வந்து பூங்கா ஒன்றில் தங்கும் பரிதாப நிலைக்கு தள்ளப்பட்ட இலங்கையர்களுக்கு தன்னார்வலர்களால் உதவி கிடைத்துள்ளதாக தகவல் வெளியாகியுள்ளது.

துபாய் மாகாணத்தில் அமைந்துள்ள அல் ஹூதைபா பூங்காவில் இருந்தே இருபதுக்கும் அதிகமான இலங்கையர்கள் பாதுகாப்பான தங்கும் இடங்களுக்கு மாற்றப்பட்டுள்ளனர்.

துபாய்க்கு வந்து தங்குவதற்கு இடமின்றி, வேலை கிடைக்காமல் அவதிக்கு உள்ளாகி, பூங்காவில் தவித்தவர்களுக்கு சமூகப் பணியாளர்கள், இலங்கையின் சஹானா நல அமைப்பு மற்றும் இலங்கை துணைத் தூதரகமும் இணைந்து உதவிக்கரம் நீட்டியுள்ளதாக தெருய வந்துள்ளது.

இலங்கையில் இருந்து வந்தவர்கள் அனைவருமே விசிட் விசா மூலம் வேலை தேடிவந்துள்ளார்கள் என கூறப்படுகிறது.

சமூக நல அமைப்புகள் மூலம் பூங்காவில் தங்கியிருந்தவர்களுக்கு தேவையான உதவிகளை ஏற்பாடு செய்துள்ளோம் என்கிறார் துபாய்க்கான இலங்கை துணைத் தூதர் நலிந்தா விஜரெத்னா.

வேலை தேடி வந்தவர்களில் பெரும்பாலானோருக்கு ஊர் திரும்புவதற்குப் பணமில்லை. குளிப்பதற்குக்கூட வசதியின்றி தவித்துள்ளார்கள்.

மேலும், துபாய் உள்ளிட்ட மாகாணங்களில் கடுமையான வெப்பம் வாட்டிவரும் நிலையில் இவர்கள் பூங்காவில் தங்கியிருப்பது அப்பகுதி மக்கள் பலரை கவலை அடைய செய்துள்ளது எனவும், அவர்கள் எடுத்த முயற்சியே, தற்போது இலங்கையர்கள் மீட்கப்பட்ட காரணமாக அமைந்த்து எனவும் கூறப்படுகிறது.

மட்டுமின்றி அப்பகுதியில்; உள்ள மக்கள் அளித்த உணவை வைத்து நாட்களைக் கடத்தியுள்ளார்கள்.

தற்போது அவர்கள் அனைவரும் செப்டம்பர் 10 ம் திகதியன்று இலங்கை செல்வதற்கு விமானப் பயண ஏற்பாடுகள் செய்யப்பட்டுள்ளன என இலங்கை துணைத் தூதரக வட்டாரங்கள் தெரிவிக்கின்றன.