வரும் தேர்தலுக்கு முன்பாக முழு ஆண்டு தேர்வுகள் அனைத்தும் முடிந்து மாணவர்கள் விடுமுறையில் இருப்பார்கள். கோடை விடுமுறையில் குடும்பத்தோடு சுற்றுலா போய் வருவதெல்லாம் சரி தான். அப்படி சுற்றிப் பார்க்க கிளம்புகிற இடத்தில் சாகச விரும்பிகளாக லைக்ஸ்களுக்கும், ஷேர்களுக்கும் நீங்கள் எடுக்கிற செல்ஃபி அடுத்தவரை கஷ்டப்படுத்தாமல் இருக்கும்படி பார்த்து கொள்ளுங்க.
மிருக காட்சி சாலையில் பார்த்தால், கூண்டுக்குள் வனவிலங்கு இருக்கிறதா? இல்லை கூண்டுக்கு வெளியே உங்களை அவை வேடிக்கைப் பார்க்கின்றனவா என்பது போல் மனிதர்கள் செய்கிற சேட்டைகளின் ரகங்கள் சொல்லி மாளாது. அவற்றையும் உயிருள்ள, உணர்வுகள் உள்ளவைகளாக மதிக்க கற்றுக் கொண்டு தொந்தரவு செய்யாமல் சுற்றிப் பாருங்க.
இனி, அனுமதியின்றி வனவிலங்குகளுடன் செல்ஃபி அல்லது புகைப்படம் எடுப்பவர்களை 7 ஆண்டுகள் வரை கைது செய்ய முடியும் என்று ஒடிசாவின் முதன்மை தலைமை வனப் பாதுகாவலர் சுஷாந்த் நந்தா எச்சரிக்கை விடுத்துள்ளார்.
இந்தியா முழுவதும் உள்ள கோட்ட வன அலுவலர்களுக்கும், வனவிலங்குப் பகுதிகளின் துணை இயக்குநர்களுக்கு இதுகுறித்து அனுப்பியிருக்கும் கடிதத்தில், ” வன விலங்குகளுடன் செல்ஃபி எடுப்பதால் ஏற்படும் தீமைகள் அதிகம். மக்கள் வன விலங்குகளுடன் எடுக்கப்பட்ட புகைப்படங்கள்/செல்பிகளை சமூக ஊடகங்களில் வெளியிடுவதைக் காணலாம்.
இதுபோன்ற வனவிலங்குகளுடன் புகைப்படம்/செல்ஃபி எடுப்பது இந்த விலங்குகளின் இயல்பு வாழ்க்கை சுழற்சியை சீர்குலைப்பது மட்டுமல்லாமல், வனவிலங்கு (பாதுகாப்பு) சட்டம், 1972-ன் விதிகளை மீறுவதாகும்.
வன விலங்குகளை புகைப்படம் எடுப்பதற்கு முன்பு வன அதிகாரிகளிடம் அனுமதி பெற வேண்டியது கட்டாயம். அனுமதியின்றி புகைப்படம் எடுத்தால் வனவிலங்கு (பாதுகாப்பு) சட்டம், 1972-ன் கீழ் கடுமையான தண்டனை வழங்கப்படும். சமூக ஊடகங்களில் அதிகரித்து வரும் வனவிலங்கு செல்ஃபிகளின் போக்கு விலங்குகள் நலன் மற்றும் பாதுகாப்பு குறித்த கவலைகளைத் தூண்டியுள்ளது.
பொறுப்பற்ற நடத்தையை ஊக்குவிப்பதன் மூலமும், வனவிலங்குகளுக்கான மரியாதையை வளர்ப்பதன் மூலமும், ஒடிசா அதன் பல்வேறு பல்லுயிர்களைப் பாதுகாப்பதை நோக்கமாகக் கொண்டுள்ளது மற்றும் சுற்றுலாப் பயணிகள் மற்றும் காட்டு விலங்குகள் சம்பந்தப்பட்ட துரதிர்ஷ்டவசமான சம்பவங்களைத் தடுக்கிறது.
இப்பிரச்னைக்கு தீர்வு காண, விழிப்புணர்வு ஏற்படுத்தவும், ஹெல்ப்லைன் எண்களை வழங்கவும், வனவிலங்குகள் மற்றும் மனித பாதுகாப்புக்கு ஆபத்தை விளைவிக்கும் செயல்களில் ஈடுபடுவதை தடுக்கவும் கள அலுவலர்களுக்கு உத்தரவிடப்பட்டுள்ளது” என அந்த கடிதத்தில் குறிப்பிடப்பட்டுள்ளது.
