ஷகிலா….
நடிகை ஷகிலா மீது அவரது வளர்ப்பு மகளே தாக்குதல் நடத்திய சம்பவம் பரபரப்பை ஏற்படுத்தியுள்ளது. தமிழ் மற்றும் மலையாளத்தில் பிரபல நடிகையான ஷகிலா தற்போது சென்னை கோடம்பாக்கத்திலுள்ள யுனைடேட் காலணியில் வசித்து வருகிறார்.
சமீபத்தில் தனியார் தொலைக்காட்சியின் குக் வித் கோமாளி நிகழ்ச்சியில் பங்கேற்று கவனம் பெற்றார். தனியார் தொலைக்காட்சி நிகழ்ச்சிகளில் பங்கேற்பது, யூட்யூப் நேர்காணல் எடுப்பது என பல்வேறு பணிகளை தற்போது மேற்கொண்டு வருகிறார்.
தனது அண்ணன் மகளான ஷீத்தலை 6 மாத கைக் குழந்தையாக இருந்தபோதில் இருந்து வளர்ப்பு மகளாக தத்தெடுத்து ஷகிலா வளர்த்து வருகிறார். இந்த நிலையில் நேற்று ஷகிலாவுக்கும் அவரது வளர்ப்பு மகள் ஷீத்தலுக்கும் இடையே திடீரென தகராறு ஏற்பட்டுள்ளது.
அப்போது ஷகிலா மீது தாக்குதல் நடத்திவிட்டு ஷீத்தல் அருகிலுள்ள தனது சொந்தத் தாயின் வீட்டுக்கு சென்றுவிட்டதாக கூறப்படுகிறது. இதனையடுத்து ஷீத்தல் தன்னை தாக்கிவிட்டதாக தனது வழக்கறிஞர் சவுந்தர்யாவுக்கு ஷகிலா தெரிவித்துள்ளார். இதுதொடர்பாக சமாதானம் செய்து வைப்பதாகக் கூறி வீட்டுக்கு நேரில் வரும்படி ஷீத்தலுக்கு சவுந்தர்யா அழைப்பு விடுத்துள்ளார்.
இதனையடுத்து ஷகிலா வீட்டுக்கு வளர்ப்பு மகள் ஷீத்தல், அவரது அக்கா ஜமீலா, அவரது சொந்தத் தாயான சசி ஆகிய மூவரும் வந்துள்ளனர். வீட்டில் பேசிக்கொண்டிருந்த போது வழக்கறிஞர் சவுந்தர்யாவை ஷீத்தல் அங்கிருந்த ட்ரேவால் தாக்கியதாகவும், மேலும் கையை கடித்து வைத்ததாகவும் கூறப்படுகிறது. அத்துடன், ஷகிலா மீதும் ஷீத்தல் உள்பட மூவரும் தாக்குதல் நடத்தி கொலை மிரட்டல் விடுத்துள்ளனர். இதனால் காயமடைந்த சவுந்தர்யா சென்னை தனியார் மருத்துவமனையில் அனுமதிக்கப்பட்டு சிகிச்சை பெற்று வருகிறார்.
சவுந்தர்யா அளித்த புகாரின் பேரில் ஷீத்தல், ஜமீலா மற்றும் சசி ஆகியோரிடம் கோடம்பாக்கம் காவல் துறையினர் விசாரணை நடத்தி வருகிறார்கள். அத்துடன், அங்கிருந்த சிசிடிவி காட்சிகளையும் ஆய்வு செய்து யார் மீது தவறு என புலனாய்வு மேற்கொண்டு வருகின்றனர்.
இதன் அடிப்படையில் ஷீத்தல் உள்ளிட்டோர் மீது வழக்குப் பதிவு நடவடிக்கை எடுக்கப்படுமா என்பது தெரியவரும். ஷகிலா மீது அவரது வளர்ப்பு மகளே தாக்குதல் நடத்திய சம்பவம் திரையுலகில் பரபரப்பை ஏற்படுத்தியுள்ளது.
