ஆர்த்தி தேவி உத்தரபிரதேச மாநிலம் கோரக்பூரில் வசித்து வந்தார். இவரது கணவர் ராம் மிலன் சென்னையில் உள்ள பாபா அனுசக்தி நிறுவனத்தில் விஞ்ஞானியாக பணியாற்றி வருகிறார்.
இவரது மூத்த மகள் வேறு ஊரில் எம்பிபிஎஸ் படித்து வருகிறார். எனவே, ஆர்த்தி தேவி தனது 17 வயது மகன் அமனுடன் தனது வீட்டில் தனியாக வசித்து வருகிறார்.
இந்நிலையில் கடந்த டிசம்பர் 3ம் தேதி பள்ளிக்குச் செல்லும் நேரம் என்பதால் தூங்கிக் கொண்டிருந்த மகனை எழுப்பியுள்ளார். இதனால் ஆத்திரமடைந்த மகன் தாயை கீழே தள்ளி விட்டு, தாயின் தலையில் பலமாக அடித்துள்ளார்.
இதில் படுகாயம் அடைந்த தாய் ஆர்த்திதேவி சம்பவ இடத்திலேயே பரிதாபமாக உயிரிழந்தார். இதனால் பதற்றமடைந்த மகன் அமன், தாயின் மரணத்தை மறைக்க முயன்றார்.
தொடர்ந்து வீட்டில் இருந்த சிசிடிவி இணைப்பை துண்டித்துவிட்டு கதவை வெளியில் பூட்டிவிட்டு தாயின் உடலுடன் 4 நாட்களாக வீட்டின் உள்ளேயே இருந்துள்ளார்.
சென்னையில் உள்ள ராம், மிலனுக்கு பலமுறை போன் செய்தும், ஆர்த்தி தேவியின் செல்போன் சுவிட்ச் ஆப் செய்யப்பட்டிருந்தது. இதற்கிடையில், ஆர்த்தி தேவியின் உடல் அழுகி, துர்நாற்றம் வீசத் தொடங்கிய போது, அமன் துர்நாற்றம் வெளியேறாமல் இருக்க ஊதுபத்திகளை தொடர்ந்து ஏற்றி வைத்துள்ளார்.
ஆனால் 5வது நாளான நேற்று அமன் வீட்டை விட்டு வெளியேறி அருகில் உள்ள கோவிலுக்கு சென்று அமர்ந்தார். அவரது தந்தை ராம் மிலன் தனது அண்ணியை போனில் அழைத்து தனது வீட்டிற்குச் சென்று சரிபார்க்கும்படி கூறினார்.
அவர் வீட்டிற்கு சென்றுப் பார்த்ததும் வீட்டினுள்ளே துர்நாற்றம் வீசியது. உடனே சென்னையில் இருந்து புறப்பட்ட ராம் மிலன் வீட்டுக்கு சென்று பார்த்தபோது ரத்த வெள்ளத்தில் மனைவி பிணமாக கிடந்தார்.
இது தொடர்பாக போலீசில் புகார் அளிக்கப்பட்டது, மேலும் அமன் அருகில் உள்ள கோவிலில் காணப்பட்டார். கீழே விழுந்து தனது தாயார் இறந்து விட்டதாகவும், 4 நாட்களாக வெளியில் பயத்தில் அலைந்ததாகவும் கூறினார்.
ஆனால் வீட்டில் ரத்த வெள்ளத்தில் கிடந்த ஆர்த்தி தேவியின் உடல் இழுத்துச் செல்லப்பட்டதை போலீசார் கண்டறிந்தனர். மேலும் அமன் போதைப் பழக்கத்திற்கு அடிமையானவர் எனவும் அக்கம் பக்கத்தினர் தெரிவித்துள்ளனர்.
பள்ளியிலும் அமன் மீது பல்வேறு குற்றச்சாட்டுகள் இருந்துள்ளது. தொடர்ந்து நடத்தப்பட்ட விசாரணையில், பள்ளிக்கு செல்லுமாறு தனது தாய் கூறியதாகவும், ஆனால் அமன் மறுத்ததாகவும், அமன் அதிகளவில் பணம் செலவழித்ததால் இருவருக்கும் இடையே வாக்குவாதம் ஏற்பட்டதாகவும் அமன் கூறியுள்ளார்.
விரக்தியில் அவரது தாயார் பணத்தை அமன் மீது வீசினார். எனவே அமன் அவளை கீழே தள்ளிவிட்டதாக ஒப்புக்கொண்டார். இதையடுத்து அமன் மீது போலீசார் வழக்குப்பதிவு செய்து அமனை சிறுவர் சீர்திருத்த காப்பகத்திற்கு அனுப்பி வைத்தனர்.
