அரசு பள்ளி ஆசிரியர்கள், அதிக சம்பளம் வாங்கும் தனியார் நிறுவனத்தில் பணிபுரியும் நபர்களை குறி வைத்து மோசடியில் ஈடுபட்ட பெண் உள்ளிட்ட இரண்டு பேரை போலீசார் கைது செய்துள்ளனர்.
எவ்வளவு தான் விழிப்புணர்வை ஏற்படுத்தினாலும் ஏமாறுபவர்களும், ஏமாற்றுபவர்களும் இருந்து கொண்டேதான் இருக்கின்றனர். இந்த ஏமாற்று வேலையில் அரசு ஆசிரியர் ஒருவர் ஈடுபட்டு வந்தது பெரும் அதிர்ச்சியை ஏற்படுத்தியுள்ளது. அந்தவகையில், ராமநாதபுரம் பகுதியில் அதிக வட்டி தருவதாக அரசு பள்ளி ஆசிரியர்கள், சம்பளம் அதிகம் வாங்கும் தனியார் நிறுவனத்தில் பணிபுரியும் நபர்களை குறிவைத்து களம் இறங்கி மோசடியில் ஈடுபட்டுள்ளது ஒரு கும்பல்.
ராமநாதபுரம் மாவட்டம் தத்தங்குடி அரசு தொடக்கப் பள்ளியில் ஆசிரியராக பணியாற்றி வந்தவர் ஆனந்த். இவர் சென்னையைச் சேர்ந்த நீதிமணி என்பவருடன் சேர்ந்து கடந்த 2018ஆம் ஆண்டு நிதி நிறுவனம் ஒன்றை தொடங்கி அதில் தன்னைப் போன்ற சக ஆசிரியர்களிடம் ஒரு லட்ச ரூபாய் பணம் செலுத்தினால் மாதம் 5 ஆயிரத்தில் இருந்து 8000 வரை வட்டி தரப்படும் என ஆசை வார்த்தை காட்டி பணத்தை பெற்றுள்ளார். அதிலும் சிலர், அதிக வட்டி வருவதால் தங்களின் சேமிப்பு பணத்தை மட்டுமின்றி நகைகளை அடகு வைத்தும் குறைந்த வட்டிக்கு பணம் வாங்கியும் இந்த நிதி நிறுவனத்தில் பணத்தை கட்டியுள்ளனர்.
அவர் கூறியது போன்றே தொடர்ந்து சில மாதங்கள் வரை பணம் பெற்றவர்களுக்கு திருப்பி சரியான அளவிலான வட்டியும் கொடுத்து வந்ததாக கூறப்படுகிறது. மேலும், இரண்டு லட்ச ரூபாய்க்கு மேல் நிதி நிறுவனத்தில் பணம் செலுத்துபவர்களுக்கு பரிசாக தங்க நகை எல்லாம் கொடுத்து அவர்களின் ஆசையை தூண்டியதாகவும் தெரிகிறது.
ஆரம்பத்தில் வட்டி கொடுத்து வந்த இந்த நிதி நிறுவனத்தார் கடந்த சில மாதங்களாக வட்டி தருவதை நிறுத்தியதால், ஏமாற்றமடைந்த ராமநாதபுரம் மூலக்கொத்தளம் பகுதியைச் சேர்ந்த துளசி மணிகண்டன் என்பவர் தனது அசல் பணத்தை திருப்பி தருமாறு ஆனந்த் மற்றும் நீதிமணியிடம் கேட்டுள்ளார். அதற்கு அவர்கள் இருவரும் உன் பணத்தை தர முடியாது. நாங்கள் ஏற்கனவே அதிக வட்டி கொடுத்து விட்டோம் என கூறியுள்ளனர். மேலும், பணத்தை கேட்டால் உன்னை கொலை செய்து விடுவோம் என்று மிரட்டியதாகவும் ராமநாதபுரம் மாவட்ட காவல் கண்காணிப்பாளரிடமும், பஜார் காவல் நிலையத்திலும் துளசி மணிகண்டன் புகார் அளித்துள்ளார்.
இதனையடுத்து புகாரின் அடிப்படையில் தீவிர விசாரணைக்கு மாவட்ட காவல் கண்காணிப்பாளர் டாக்டர் வருண்குமார் உத்தரவிட்டுள்ளார். அதன்படி, மோசடி கும்பலை அலேக்காக தூக்கிய ராமநாதபுரம் காவல்துறையினர் நடத்திய விசாரணையில், இவர்கள் அரசு ஊழியர்கள் தனியார் நிறுவனத்தினர் என யாரையும் விட்டுவைக்காமல் மூன்று கோடி ரூபாய் சுருட்டியது அம்பலமானது.
இதனை தொடர்ந்து இந்த மோசடியில் ஈடுபட்ட சென்னையை சேர்ந்த நீதிமணி மற்றும் ராமநாதபுரம் மாவட்டம் சாயல்குடியை சேர்ந்த ஆனந்த் என்ற ஆசிரியர், நீதிமணியின் மனைவி மேனகா ஆகிய 3 பேர் மீதும் வழக்குப்பதிவு செய்த போலீசா ர் நீதிமணி மற்றும் ஆனந்த் ஆகிய இருவரையும் கைது செய்து சிறையில் அடைத்துள்ளனர்.
இது போன்ற நிதி நிறுவனத்திற்கு எந்த பாதுகாப்பும் இல்லாததோடு எப்போது வேண்டுமானாலும் பணத்தை சுருட்டிக் கொண்டு ஓடும் மோசடி சம்பவங்கள் ஆங்காங்கே நடந்து வந்தாலும் கூட, உழைக்காமல் அதிக பணம் கிடைக்கும் என்ற ஆசையில் பணத்தை கொட்டிக் கொடுத்து பின்னர் பொறியில் சிக்கிய எலிபோல் துடிப்பதும் தொடர்ந்து நடந்து கொண்டுதான் இருக்கிறது.
25 கோடி ரூபாய் சொத்துக்கள் பறிமுதல்: இந்த மோசடி கும்பலிடமிருந்து 25 கோடி ரூபாய் மதிப்புள்ள நில பத்திரங்கள், 33 லட்சம் பெறுமானம் உள்ள தங்க நகைகள், 25 லட்சம் மதிப்பிலான கார்கள் உள்பட மொத்தம் 25 கோடியே 62 லட்சம் ரூபாய் மதிப்புள்ள அசையும் மற்றும் அசையா சொத்துக்களை போலீசார் பறிமுதல் செய்துள்ளனர்.
இந்த மோசடி கும்பல் நூற்றுக்கும் மேற்பட்ட ஆசிரியர்களிடமிருந்து பெற்று, அந்தப் பணத்தைக் கொண்டு பிரபல முன்னணி தமிழ் நடிகர்களை வைத்து திரைப்படம் தயாரித்துள்ளதாகவும் திடுக்கிடும் தகவல் வெளியாகி உள்ளது.
